Sut I Gyflwyno Cais

Gall yr IRM gynnig proses panel adolygu annibynnol pan fydd eich asiantaeth yn bwriadu peidio â'ch cymeradwyo fel gofalwr maeth neu fabwysiadwr, neu'n bwriadu rhoi terfyn ar eich cymeradwyaeth neu newid eich telerau cymeradwyo.

1. Gallwch chi dderbyn y cynnig
2. Gallwch wneud sylwadau ysgrifenedig i’ch asiantaeth fabwysiadu, neu
3. Gallwch wneud cais ysgrifenedig i IRM Cymru am gael adolygu dyfarniad cymhwyster yr asiantaeth fabwysiadu

Ond, ni allwch wneud rhif 2 a rhif 3.

Beth gall IRM Cymru ei wneud drosoch chi

Mae IRM Cymru yn broses adolygu a gynhelir gan Banel Adolygu sy’n annibynnol ar yr asiantaethau mabwysiadu.

Os byddwch yn dewis defnyddio IRM Cymru bydd y panel adolygu:

• yn adolygu eich addasrwydd fel darpar fabwysiadwr/fabwysiadwyr
• yn gwneud argymhelliad o’r newydd i’ch asiantaeth ar eich addasrwydd i fabwysiadu plentyn

Y pethau nad yw IRM Cymru yn eu gwneud

• Nid yw’n gwneud penderfyniad terfynol ynghylch eich achos. Eich asiantaeth fabwysiadu fydd yn gwneud hynny ar ôl ystyried argymhelliad panel IRM.
• Nid yw’n ystyried a ddylai mabwysiadu fod yn gynllun ar gyfer plentyn.
• Nid yw’n ystyried a ddylid lleoli plentyn gyda darpar fabwysiadwr penodol.
• Nid yw’n ymdrin â chwynion yn erbyn yr asiantaeth fabwysiadu.

Sut mae’r Panel Adolygu’n gweithio

Mae’r Panel Adolygu yn ystyried yr wybodaeth ganlynol er mwyn gwneud ei argymhelliad:

• pob gwybodaeth a gyflwynwyd i’r panel mabwysiadu gwreiddiol
• eich rhesymau dros ofyn am adolygiad
• unrhyw wybodaeth ychwanegol a ystyriwyd gennych

Os bydd ar y Panel Adolygu angen mwy o wybodaeth, gwneir cais amdano gennych chi neu gan eich asiantaeth fabwysiadu cyn cyfarfod y panel.

Cewch wahoddiad i ddod i’r cyfarfod. Bydd gan y Panel Adolygu gwestiynau i chi ac i’r asiantaeth fabwysiadu. Bydd y panel hefyd yn cael cyngor cyfreithiol a meddygol, os bydd gofyn.

Canlyniadau a deilliannau

Mae’r Panel Adolygu yn gwneud ei argymhelliad a bydd yn rhoi copi o gofnodion y panel i chi a’r asiantaeth.

Rhaid i’r asiantaeth fabwysiadu ystyried yr argymhelliad hwn yn ogystal ag argymhelliad y panel mabwysiadu gwreiddiol wrth wneud ei phenderfyniad terfynol ynghylch eich addasrwydd i fabwysiadu plentyn.

Gwneud cais

Rhaid i chi wneud cais ysgrifenedig sy’n cynnwys y canlynol:

• Y rhesymau pam rydych chi’n anghytuno â phenderfyniad eich asiantaeth fabwysiadu,
• dyddiad y llythyr a gawsoch gan eich asiantaeth fabwysiadu yn rhoi gwybod i chi am eich dyfarniad,
• enw a chyfeiriad eich asiantaeth fabwysiadu. Bydd hyn yn fodd i ni gael yr wybodaeth y bydd ei hangen ar y Panel Adolygu ganddyn nhw.

Rhaid i chi wneud eich cais o fewn 40 diwrnod i ddyddiad llythyr yr asiantaeth fabwysiadu.

Gallwch anfon eich cais atom trwy’r post neu ar e-bost. Mae’n bwysig nad ydych chi’n anfon eich cais i unrhyw gyfeiriad arall gan y bydd hynny’n achosi oedi cyn i’r panel adolygu ystyried eich cais.

Gellir cyflwyno ceisiadau i: irm@childreninwales.org.uk

Termau

“Dyfarniad cymhwyster” yw dyfarniad y mae’r asiantaeth fabwysiadu’n ei wneud, ei bod yn:

• cynnig peidio â’ch cymeradwyo fel rhywun addas i fabwysiadu;
• anfodlon bellach eich bod yn addas i fabwysiadu;
• ystyried nad yw darpar fabwysiadwr yn addas i fabwysiadu plentyn, ac nad yw’n cynnig ei gymeradwyo ef/ei chymeradwyo hi fel rhywun addas i fabwysiadu plentyn.